Кано́н Свято́му Проро́ку Иоа́нну Предоте́чи

Тропарь, глас 2-й.

Па́мять пр́аведнаго с похвала́ми; тебе́ же довле́ет свиде́тельст­во Госпо́дне Предоте́че. Яви́лбося еси́ во­и́стину проро́к честне́йши, я́ко и в бы́ст­ринах крести́ти сподо́бился еси́ Пропове́даннаго. Тем же и за и́стину пострада́в ра́дуяся, благовести́л еси́ и во а́де су́щим, Бо́га я́вльшагося пло́тню, взе́млющаго грехи́ ми́ра, и подаю́щаго нам ве́лию ми́лость (дважды).

Слава, и ныне, богородичен. Вся па́че смы́сла, вся пресла́вная Твоя́ Богоро́дице та́инства, чистото́ю запечатле́нна, и де́вством храни́ма, Ма́ти разуме́ся нело́жна, Бо́га ро́ждьши и́стиннаго, Того́ моли́ спасти́ся душа́м на́шим.

Канон, глас 2-й. Песнь 1, ирмос.

Во глубине́ потопи́ дре́вле, фараони́тская вся во́инства, преоруже́ну си́лу. Вопло́щьжеся Слово, преспе́ющыя грехи́ потреби́ло есть, пресла́вныи Госпо́дь, я́ко просла́вися.

Запев. Святы́и вели́ким Иоа́нне Предо­те́че Госпо́день, моли́ Бо́га о на́с (поклон).

Крести́телю Предоте́че Христо́в, по­гружа́емый всегда́ сластьми́ теле́сными, ум мой укрепи́, и во́лны страсте́й укроти́, я́ко да в тишине́ боже́ственней быв, при́сно сла́влю тя.

Запев. Недоуме́нным просвети́вся про­свеще́нием, я́ко многосве́тлая звезда́, мы́сленному Восто́ку предте́кл еси́. Им же озари́тися се́рдцу моему́, Крести́телю моли́, омраче́нному все́ми бесо́вскими приложе́нии.

Слава. В реце́ Бе́здну иногда́ всему́дре погрузи́, пото́п содева́ющу благода́тию всего́ преступле́ния. Но молю́ся: пото́ки пребога́те мои́х прегреше́нии изсуши́, боже́ственным хода́тайством си.

И ныне, богородичен. Чи́стыя Де́вы, и́же Бо́га воплоти́вшия сро́дник был еси́, блаже́нне Предоте́че. С Не́ю же тя чтем и мо́лим, и́же в небе́снем хра́ме твое́м ны­́не живу́ще, хра́мы и нас сотвори́ Ду́ху Свято́му.

Катавасия. Изба́ви от бед рабы́ своя́, святы́и вели́кии Иоа́нне, Предоте́че Госпо́день, я́ко вси по́ Бозе к тебе́ прибега­́ем, ты́ бо мо́лиши о на́с Христа́ Бо́га на́шего (поклон).

Го́споди, поми́луй (трижды,с поклонами).

Песнь 3, ирмос.

На ка́мени мя ве́ры утверди́, разшири́ уста́ моя́ на враги́ моя́. Возвесели́бося дух мой воспева́ти: несть свя́та, я́коже Бог наш. И несть пра́ведна, па́че Тебе́ Го́споди.

Запев. Исцели́ стру́ны души́ моея́, и ум мой омраче́нный ле́ностию, озари́ боже́ственным си хода́тайством, Госпо́день Пре­доте́че. И вся́ких изба́ви мя сопроти́вных обстоя́нии, молю́ся.

Запев. Непло́дьствие разреши́л еси́ ро́ждьшей, роди́вся Бо́жиим промышле́нием, прему́дре Проро́че. Непло́дное у́бо се́рдце мое́, плодоно́сно ны́не соде́лай хода́тайством си, доброде́телей приноси́ти израще́ния.

Слава. Иже любо́вию ти созда́вшыя боже́ственнаго хра́ма, вы́шняго жития́ улучи́ти моли́. Иже ве́рою хра́му твоему́ служа́щия, хра́мы Ду́ху Боже́ственному сотвори́, Крести́телю и Предоте́че моли́твами си.

И ныне, богородичен. Весели́тся Предоте́ча в ложесна́х носи́м ма́терних, и поклоня́шеся Го́споду носи́му во утро́бе Твое́й Богора́дованная. Его́ же моли́, от вся́кия ско́рби изба́вити нас. Катавасия.

Седален, глас 2-й.

Милосе́рдия ра́ди ми́лости Бла́же, спасти́ Свое́ созда́ние Христе́ прии́де, прекло́нь небеса́ схожде́нием Свои́м. Тем же стра́шное смотре́ние Твое́ пою́ще вопие́м Ти: мольба́ми Предоте́чи Твоего́, очище́ние грехо́в пода́ждь нам, я́ко еди́н Благоутро́бен.

Слава, и ныне, богородичен. Предста́­тельнице те́плая христия́ном, Сы́ну Сво­ему́ моли́ся при́сно Богоро́дице, вся́каго злоде́йства и огорче́ния изба́вити нас бор­ца́. И да́ти нам проще́ние, в них же согреши́хом, за милосе́рдие щедро́т, Твои́ми моли́твами, Ма́ти Де́во.

Песнь 4, ирмос.

Прише́ствовав от Де́вы, не хода́тай ни а́нгел, но Ты Сам Го́споди вопло́щься и спасе́ всего́ мя челове́ка. Тем вопию́ Ти: сла́ва си́ле Твое́й.

Запев. Прекло́ньшему небеса́, и челове­́ком Примесйи́вшуся, гла́ву преклони́л еси́ десни́цею свое́ю пребога́те. Е́ю же мя со­храни́, во смире́нии соблюда́я се́рдце мое́.

Пусты́ня тебе́ граждани́на непрохо́дна иму́щи, многопло́дна бысть блаже́нне Предоте́че. Тем же вопию́ ти: пу́сту вся́чес­ких боже́ственных дея́нии бы́вшу ду́шу мою сотвори́ плодоно́сну.

Запев. Зако́н боже́ственныи управля́я, беззако́нно закала́ешися. Тем же мо́лим­ся ти: беззако́ннующа мя всегда́, и потоп­ля́ема бесо́вскими прельще́нии, испра́ви.

Слава. Созда́в сам себе́ храм Влады́це Ца­рю́, к боже́ственным жили́щем ны́не преше́л еси́ Предоте́че. Их же получи́ти моли́, И́же тебе́ пресвяты́и храм воздви́гшаго.

И ныне, богородичен. При́зри на мя боля́щаго Всенепоро́чная, и разреши́ стра́с­ти моя́ лю́тыя, и неудо́бь исце́льныя, я́ко да велича́ю Тя, возвели́чившую все челове́чество. Катавасия.

Песнь 5, ирмос.

Просвеще́ние во тьме́ лежа́щим, и спасе́ние ненача́емым Хри­сте́ Спа́се мой, к Тебе́ у́тренюю Царю́ ми́р­ный, просвети́ мя сия́нием Си, ино́го бо ра́зве Тебе́ Бо́га не зна́ем.

Запев. В тече́ниих иорда́нския воды́ неистле́ния Предоте́че, крести́в Христа́, мо­ли́ источе́ния страсте́й мои́х изсуши́ти. И пото́ки пи́щныя насле́довати, и пра́вед­ных кра́снаго ра́дования.

У́же рыда́ю и сотерза́юся стра́хом, и недоуме́нием всегда́ содержи́м есмь, помышля́ю моя́ дея́ния, и бу́дущаго суди́ща у́жас. Благоутро́бне Го́споди пощади́ мя, Твоего́ Крести́теля моле́нием.

Запев. Зако́н полага́я лю́дем спасе́ныи, в раска́янии Предоте́че прегреше́нии бы́вшим, посреде́ зако́на и благода́ти став. Сего́ ра́ди мо́лим тя: образы́ покая́ния нас просвети́.

Слава. Даждь ми вре́мя покая́ния, уны­́нием преше́дшу все, и изжи́вшееся Благода́телю, име́я на се моля́щаго Тя Сло́ве, Иоа́нна вели́каго Предоте́чу, и покая́нию всекра́снаго пропове́дника.

И ныне, богородичен. Наве́тми и ловле́нии льсти́ваго умертви́хся, Влады́чице Всенепоро́чная оживи́ мя, ро́ждьшая Бо­горо́дице всем Живо́т соста́вныи, да Тя пою́ благоче́стно Всепе́тую. Катавасия.

Песнь 6, ирмос.

В бе́здне грехо́вней одер­жи́м, неизсле́дную милосе́рдия Твоего призыва́ю бе́здну: от тли́ Бо́же мой возведи́ мя.

Запев. Глас Сло́ва пропове́давыи, всех гла́сы приима́ти проси́, грехо́в проще́ние дарова́ти, и́же с любо́вию пою́щим тя.

Запев. Сокруше́ние души́ мое́я исцели́, и грехо́в бре́мя разреши́. И па́че наде́­жи спаси́ мя, моли́твами си блаже́нне Предоте́че.

Слава. Ису́са Его́ же руко́ю свое́ю кре­сти́, Предоте́че моли́, руко́ю изба́вити мя грехи́ Взима́юща, к Вы́шнему ру́це всег­да́ воздвиза́юща.

И ныне, богородичен. Дрема́ние ле́ностно одержи́т мя, сон грехо́вный тяго­ти́т се́рдце мое́, Твои́м Пречи́стая бде́нным хода́тайством, воздви́гни и спаси́ мя. Катавасия.

Слава, и ныне. Кондак, глас 3-й.

Непло́ды днесь, Христо́ва Предоте́чу ражда́ет, и той есть соверше́ние вся́каго проро́чес­тва. Его́ же бо проро́цы пропове́даша, на То́м во Иорда́не ру́ку положи́в, яви́ся Бо́жию Сло́ву проро́к и пропове́дник, вку́пе и Предоте́ча.

Икос.

Восхва́лим ны́не Госпо́дня Пре­доте́чу, его́ же свяще́ннику Елисаве́ть ро­ди́, из ложе́сн непло́дове, но не без се́мене. Христо́с бо еди́н вмести́лище про́йде непроходи́мо без се́мене. Иоа́нна непло́ды роди́, бе́з мужа же сего́ не роди́. Ису́са же осене́нием Отца́ и Ду́ха Бо́жия, Де́вая ро­ди́ чи́стая. Но Безсе́менному яви́ся от непло́дове, проро́к и пропове́дник, вку́пе и Предоте́ча.

Прокимен, глас 4-и:

И ты отроча́, проро́к Вы́шняго нарече́шися.

Стих: Благослове́н Госпо́дь Бог изра́илев, я́ко посети́ и сотвори́ избавле́ние лю­́дем Свои́м.

Евангелие от Луки, зачало 31.

Во́ время о́но, изы́де сло́во о Ису́се по всей Июде́и, и по всей стране́. И возвести́ша Иоа́нну ученицы́ его́ о всех сих. И при­зва́в два не́кая от учени́к свои́х Иоа́нн, по­сла́ ко Ису́су глаго́ля: Ты ли еси́ гряды́и, или́ ино́го ча́ем? Прише́дша же к Нему́ му́жа, ре́ста: Иоа́нн Крести́тель посла́ нас к Тебе́, глаго́ля: Ты ли еси́ гряды́и, или́ ино́го ча́ем? В той же час, исцели́ мно́ги от неду́г, и ран, и дух злых. И мно́гим сле­пы́м дарова́ прозре́ние. И отвеща́в Ису́с рече́ и́ма: ше́дша возвести́та Иоа́нну, я́же ви́деста и слы́шаста, я́ко слепи́и прези­ра́ют, хро́мии хо́дят, прокаже́нии очища­́ются, глуси́и слы́шат, ме́ртвии воста́ют, ни́щии благовеству́ют. И блаже́н есть и́же а́ще не соблазни́тся о Мне. Отше́дшема же ученико́ма Иоа́нновама, нача́т глаго́лати к наро́дом о Иоа́нне: Чесо́ изыдо́сте в пусты́ню ви́дети? Тро́сть ли ве́тром коле́блем? Но чесо́ изыдо́сте ви́дети? Челове́ка ли в мя́кки ри́зы оде́яна? Се и́же во оде́жи сла́вней, и пи́щи су́щей, в ца́р­ствии суть. Но чесо́ изыдо́сте ви́дети? Проро́ка ли? Ей глаго́лю вам, и ли́ше про­ро́ка. Сей бо есть, о нем же пи́сано есть: се Аз послю́ а́нгела Моего́ пред лице́м Твои́м, и́же устро́ит путь Твой пред Тобо́ю. Глаго́лю бо́ вам: болии в рожде́нных же­на́ми проро́к Иоа́нна Крести́теля, никто́же есть. Мни́и же в Ца́рствии Бо́жии, бо­́лии его́ есть. И вси лю́дие слы́шавше, и мытари́е, опра́вдиша Бо́га, кре́щьшеся креще́нием Иоа́нновым. Фарисе́е же и за­ко́нницы, сове́т Бо́жии отверго́ша в себе́, не кре́щьшеся от него́.

Стихера, глас 1-й:

Пропове́дник быв А́гньца Бо́жия Сло́ва, Иоан́не проро́че и Предоте́че. Прорица́еши бо бу́дущая, и предглаго́леши конце́м: се А́гнец Бо́жии, взе́мляи грехи́ ми́ра, и подая́ всем мир и ве́лию ми́лость.

Песнь 7, ирмос.

Богопроти́вно веле́ние, беззако́нующа мучи́теля, высо́к пла́мень вознесло́ есть. Христо́с же просте́р благо­чести́вым де́тем, хлад духо́вный. Сы́и благослове́н и препросла́влен.

Запев. Коре́ние я́ко секи́рою, твое́ю моли́твою, посека́я пострека́теля страсте́й се́рдца моего́, всади́ Предоте́че боже́ственнаго безстра́стия страх, неразу́мия моего́ я́же к Бо́гу, и вся́кия зло́бы отчужда́я мя.

Запев. В струя́х иорда́нских я́ко крес­ти́л еси́, Покрыва́ющаго вода́ми превы́спрення Го́спода. Того́ моли́, во́ду дарова́ти боже́ственнаго умиле́ния присно очи́ма мои́ма, сла́вный Предоте́че.

Слава. Иже ми́ру взе́млющаго грехи́, А́гньца Бо́жия Предоте́че пропове́дав, Того́ моли́, от ко́злищ ча́сти яви́ти мя чу́жда, и десны́м Его́ овца́м, мене́ сочета́ти сла́вне.

И ныне, богородичен. Егда́ у́бо непло́д­ная утро́ба носи́ла Тя Де́во, во утро́бе носи́вшую Сло́во воплоще́нно. Его́ же боже́ственным взыгра́нием, вели́кии Предоте́ча непло́дный всесвято́е прозябе́ние позна́в, ра́дуяся поклони́ся. Катавасия.

Песнь 8, ирмос.

Пещь о́гнена иногда́ в Вавило́не, де́тели разделя́ше боже́ственным веле́нием, халде́и опаля́ющи, ве́рный же прохлажда́ющи пою́щих: благослови́те вся де́ла Госпо́дня Го́спода.

Запев. Даждь десни́цу мне, на земли́ лежа́щему, и́же десни́цу просте́р Предо­те́че, и омы́л еси́ вода́ми Нескве́рнаго. И изба́ви мя скве́рн теле́сных, всего́ мя очи­ща́я покая́нием, и спаси́ мя.

Иму́щи душе́ вре́мя пока́ятися, ле́ности тя́жкий сон оттряси́. И спе́шно побди́, вопию́щи Влады́це своему́: Милосе́рде уще́дри мя, Крести́теля Твоего́ мольба́ми.

Запев. Пото́цы страсте́й, и во́ды зло́бы до души́ моея́ внидо́ша, блаже́нне Предоте́че, потщи́ся ско́ро изя́ти мя. И́же реч­ны́ми струя́ми измы́в, безстра́стия ти́хую Пучи́ну.

Слава. Увы́ мне, мно́га зла сотво́ршему. Увы́ мне, еди́ному прогне́вавшему Бо́га Преблага́го. Крести́телю Христо́в помози́ ми, и пода́ждь прегреше́нием мои́м разреше́ние, и долго́м мои́м отсече́ние, хо­да́тайством си.

И ныне, богородичен. Вы́шняго Бо́га пло́тию ро́ждьшая, от гно́я мя возведи́ страсте́й. Оскорбля́ющих мя и лю́те все­го́ обнища́вша, и боже́ственными обогати́ мя доброде́тельми Пречи́стая, я́ко да пою́ Тя спаса́ем. Катавасия.

Песнь 9, ирмос. Безнача́льна роди́теля Сын, Бог и Госпо́дь, вопло́щься от Де́вы нам яви́ся, омраче́ныя просвети́ти, и собра́ти расточе́ныя. Тем же Всепе́тую Богоро́дицу велича́ем.

Запев (поклон). Ка́ла мя изба́ви грехо́внаго Го́споди, безгре́шне еди́не, и Многоми́лостиве, Крести́теля мольба́ми, и́же Тебе́ пропове́да всему́ ми́ру А́гньца Бо́жия, взе́млющаго челове́ком грехи́.

Я́ко шипо́к благово́нен, я́ко благоуха́н­ный кипари́с, я́ко неувяда́емый крин, я́ко ми́ро че́стно, име́ю тя Госпо́день Предоте́че, мои́х дел злосмра́дия, да изба́влюся моли́твами твои́ми, прибега́я под кров твой.

Запев. Непло́дствующа мя безпло́дием всеблаже́нне, сотвори́ де́лателя доброде́телей, благоча́дие при́сно приноси́ти, ча́до мя Госпо́дне творя́, и прича́стника Боже́ственному Ца́рствию, и святы́х собо́р единожи́теля.

Слава. Нам лю́бящим тя, и ве́рою бла­жа́щим, и в боже́ственнем хра́ме твое́м лику́ющим, пода́ждь с небесе́ разреше́ние лю́тых, Предоте́че Госпо́день, и житию́ исправле́ние.

И ныне, богодюдичен. Носи́му во утро́бе богома́терне, И́же вся нося́щему ма́нием, поклони́лся еси Проро́че. С Не́ю же моли́, смире́нней спасти́ся души́ моей, во мно­́гая впа́дающи по вся́ дни согреше́ния. Катавасия.

Задостойник: Влады́чице, приими́ моли́тву раб Свои́х (поклон земной).

Трисвято́е, и по Отче наш. Молитва Исусова. Тропарь: Па́мять пра́веднаго. Сла­ва, кондак: Непло́ды днесь. И ныне, богородичен: Вся па́че смы́сла. Го́споди поми­́луй (40, с поклонами). Слава, и ныне. Честне́йшую херуви́м. Слава, и ныне. Го́споди поми́луй (дважды) Го́споди благослови́ (с поклонами).

Отпу́ст. Го́споди, Ису́се Христе́, Сы́не Бо́жии, моли́тв ра́ди Пречи́стыя Ти Ма́тере, честна́го и сла́внаго проро́ка и Предоте́чи, Крести́теля Иоа́нна, и всех свя­ты́х, поми́луй и спаси́ нас, я́ко Благ и Человеколю́бец. Аминь.

Го́споди, поми́луй (трижды), и обычные исходные поклоны.