Полунощница воскресная (8 гласов)

ПОЛУНОЩНИЦА НЕДЕЛЬНАЯ

Подобает ведати, аще несть в неделю бдение всенощное, бывает прежде утрени полунощница. Начало творим якоже и прежде явлено, в повседневн ой полунощнице, и глаголем вся, тамо писанная. И по пятьдесятном псалме глаголем канон Пресвятей и Животворящей Троице, во октаи настоящаго гласа.


Перваго гласа

Канон Пресвятей и Живоначальней Троице, творение Митрофаново, нося краегранесие сицево: Едино Тя пою, Трисолнечное естество.

Песнь 1.

Ирмос. Твоя победителная десница, боголепно в крепости прославися. Та бо Безсмертне всемогущи противныя сотре, израильтяном путь глубины обновльши.

Запев: Пресвятая Троице Боже наш, слава Тебе (поклон).

Едино трисоставное Начало, серафими немолчно славят, безначально, присносущно, непостижно, творительно всех, еже и всяк язык верно поет песньми.

Запев. Да человеком единьственое, трисиянное явиши Твое Божество, создав бо человека по Своему образу, вообразив ум ему и слово, и дух дав, яко Человеколюбец.

Слава. Свыше показав единьственую, в триех богоначалных составех державу, Отче, рекл еси равнодетельному Сыну Своему и Духу:

приидите, сошедше, языки их размесим.

И ныне, Богородичен. Ум убо не рожденыи Отец, образно премудрыми провещася, Слово же собезначальное Сын соестественыи, и Дух Святыи, Иже в Девей от слова создав воплощение.

Песнь 3.

Ирмос. Иже един сведыи земных существо немощное, и милостивно в не оболкся, препояши мя свыше силою, воспевати Ти Святыи, церкви душевная, не изреченныя славы Ти Человеколюбче.

Запев. Ты древле яве Аврааму, яко явися трисоставен, единьственым же естеством Божества, богословие истиннейшее образно явил еси, и верно поем Тя, единоначальнаго Бога, и трисолнечнаго.

Запев. Из Тебе Отче, рождься боголепно и нетленно, просия Свет от Света, Сын непременен, и Дух Божественыи Свет изыде, и единаго Божества лучи трисоставней поклоняемся, и верно славим (поклон).

Слава. Единица Троица преестествена, неизглаголанно паче смысла, умными существы славится, трисвятыми гласы немолчно вопиюще хвалу, с ними же согласно поется и нами трисоставен Господь.

И ныне, Богородичен. Из Тебе временно без семене, произыде прелетныи, уподоблься нам невидимыи, и едино естество и господьство Отчее научи, и Сына, и Духа, Богородице. Тем же Тя славим.

Господи помилуй (трижды).

Седален. Глас 1-й.

Подобен: Гроб Твой, Христе:

Троице вседетельная и преблагая Единице, приими мольбы вопиющих непрестанно, бренными устнами: Свят, Свят, Свят воспеваемыи серафимски. Жизнодавче спаси и ущедри, иже во святей церкви Твоей зовущих: Господи слава Тебе.

Слава, и ныне, Богородичен.

Помилуй нас, иже к Тебе взывающих Пресвятая Чистая, в нощи и во дни вопиющих, очисти наша прегрешения, ибо Милосердаго имаши послушающа Твоя мольбы, Матернею убо молитвою объемши умоли.

Песнь 4.

Ирмос. Гору Тя благодатию Божиею присенну, прозорливыма Аввакум усмотрив очима, из Тебе изыти Израилеви провозглашаше святаго, на спасение наше и обновление.

Запев. Просияй ми богоначальная трисолнечная сияньми, Твоими богодетельными лучами, сердечныма очима доброту облистати, еяже паче ума богоначальныя Ти светлости, и светодателнаго и сладкаго Причастия.

Запев. Первее небеса утверждь Господи, и всю силу их Словом Своим вседетельным, и Духом уст соестественым, с Ними же владычествуеши всяческим, трисиянным единоначальным Божеством.

Слава. Якоже созда мя, по образу Своему и по подобию, богоначальная и вседетельная Троице, вразуми и просвети творити волю Твою святую и благую, в крепости совершеную.

И ныне, Богородичен. Родила еси Пречистая Единаго от Троицы, Богоначальна Сына, воплощьшася нас ради из Тебе, и просвещьша земных, трисолнечнаго Божества невечерним светом и сияньми.

Песнь 5.

Ирмос. Просвещеи сиянием пришествия Твоего Христе, и освящеи крестом Си мiрския концы, сердца просвети светом Твоего богоразумия, правоверно хвалящих Тя.

Запев. Иже первую ангелом утварь славою посреде, неприступными Твоея доброты лучами осиявши, Твоими зарями просвети, Троице единовластная, православно Тебе поющих.

Запев. Ныне единоестественная богоначальная трисолнечная, воспеваем Тя, еже осуществовала еси за благость, прегрешений и напастей испрошающи избавления, и бед и скорбей.

Слава. Отца и Сына и Святаго Духа, едино Естество и Божество вернии славим, раздельно и нераздельно, единаго Бога, невидимыя и видимыя твари.

И ныне, Богородичен. Речения всех пророк прописаша Пречистая, Твое Рожество, неизреченное и неудобь сказуемое, еже мы познахом, тайне научаеми единьствену и трисолнечну Божеству.

Песнь 6.

Ирмос. Обыде нас последняя бездна, и несть избавляяи, вменихомся яко овча на заколение, спаси люди Своя, Боже наш. Ты бо крепость немощным еси и исправление.

Запев. Равностоятельную силу яко имущи, Троице пресущная, в той же воли хотения, Единица еси проста и нераздельна, Ты убо нас силою Своею соблюди.

Запев. Ты вся веки хотением Своим, яко Блага, составила еси от несущих, непостижимая Троице, таже и человека создала еси, но и ныне от всякаго избави мя обстояния.

Слава. Безначальная и сопрестольная Троице Святая, Отче и Сыне и Душе, вся живящи, вся же святящи, вся же спасающи единою силою. Тя бо славят херувими и мы недостойнии хвалу Ти воздаем.

И ныне, Богородичен. Солнца незаходимаго Храм была еси, создавшему и учинившему светила великая всесильно, Пречистая Дево Богоневесто, но и ныне страстей мя избави и мучения.

Господи помилуй (трижды).

Седален. Глас 1-й.

Подобен: Гроб Твой, Спасе:

Припадаем Ти верою от сердца вопиюще: помилуй нас непотребныя Своя рабы, Троице Преблагая, Отче и Сыне со Духом, и умилосердися Всемилостивая, на стадо еже собра мудре, непрестанно славящее Твою благость.

Слава, и ныне, Богородичен.

Дево, Иже из Тебе неизреченно рождьшемуся молися: наша облегчити сердца, во глубине отчаяния отягченная прегрешеньми, и возведи от унынии тяжких, славити Тя Всемилостивая, едину надежду рабом Твоим.

Песнь 7.

Ирмос. Тебе мысленую Богородице пещь, разсмотряем вернии, якоже бо отроки спасе три превозношаемыи, мiр обновил есть, во чреве Твоем совершен, восхваляемыи Отцем Бог благословен еси.

Запев. Слово Божие соестественое, озарение Вседержителя Бога, яко же обещася, еже во мне богодетельное вселение сотвори, яко благоутробен, со Отцем Твоим и Духом, и страшна покажи мя бесом и страстем.

Запев. Да Твоего благосердия Владыко пучину покажеши нам, Сына Своею к нашему послав смирению, да паки вообразит на первую светлость, но и ныне божественым мя вразуми Духом.

Слава. Треми святствы едино Божество славим, Отца безначальнаго, Сына же сопрестольна, и Духа во единой державе, и верно вопием: Отец наших Боже благословен еси.

И ныне, Богородичен. Иже на Херувимском Престоле носимыи, всяческих Царь, во утробу Твою девьственую вселися Пречистая, всех избавляя от тли, яко Человеколюбец, но и ныне Твоими молитвами сохрани мя.

Песнь 8.

Ирмос. Чюдо превелие, росодавицу вообрази пещь образом, и яже бо прият, не опали юных, тако же ни Огнь Божественыи Деву, Юже пройде чисту. Тем поюще возопием: да благословит тварь всякая Господа и превозносит Его во веки.

Запев. Манием богодетельным Господи всех, трисоставне и Вседержителю, небеса простерл еси яко кожу, таже и земли отделил еси глубину, всесильною Ти горьстию. Тем же и рабы Своя укрепи, любовию и верою Твоею Человеколюбче, да Тя поем во вся веки.

Запев. Просвети богоначальным светом человеки, поющия Твой трисолнечныи Свет, единьственое же паки Существо, еже к Твоим светодательным лучам призирати присно, ими же насыщуся славы Твоея сладкия, богодательныя и всебогатыя, и превозношу Тя верно во вся веки.

Слава. Приими хвалу и честь от непостизающаго ума нашего, Троице пресовершеная, вся озаряющи и ум просвещающи, областию Си и силою. Тя бо славят небесныя силы, и мы земнии немолчно вопием, и превозносим во вся веки.

И ныне, Богородичен. Вознесе на небеса, человеческое прием естество непреложно, Сын Твой Пречистая Богородице, премножеством благости, избавль древния тли. Ему же благодарьствено воспеваем, да благословит тварь всякая Господа и превозносит Его во веки.

Песнь 9.

Ирмос. Образ чистаго Рожества Твоего, распалаему купину яви неопалиму и ныне на нас напастей свирепеющую пещь угасити молимся, да Тя Богородице непрестанно величаем.

Запев с поклоном. Спаси Спасителю твари, чувьственыя и умныя рабы Твоя, от бесовскаго навета и озлобления, Пресвятая Троице единосущная, и соблюди Свое стадо всегда ненаветно.

Запев. Да глубину неизочтенную и существенную, покажеши Своея благости, дал еси нам трисолнечне и единоначальныи Боже всесильне, обеты спасительныя Твоим рабом, яже совершити сподоби.

Слава. Призри к нашим мольбам, иже в трех богоначальных составех, един Сыи Бог всегда славимыи, и подаждь Твоим рабом утешение, молитвами Пречистыя и Всепетыя Богоматере.

И ныне, Богородичен. Не стерпе земнаго естества зрети в тление впадша, преслушанием первозданнаго, но преклонь небеса сниде, не разлучься, в Девей без отца воплощся, да земныя обожит.


Втораго гласа

Канон Пресвятей и Живоначальней Троице, творение Митрофаново, емуже краегранесие: Троице пою Богоначалия честь. Глас вторый.

Песнь 1.

Ирмос. Во глубине потопи древле, фараонитьская вся воиньства, преоружена сила. Воплощьшееся Слово, преспеющия грехи потребило есть, преславныи Господь, яко прославися.

Запев: Пресвятая Троице Боже наш, слава Тебе (поклон).

Троичное единоначалное естество Божества, песнено воспоем глаголюще, милости пучину неизчерпаемую, существеную яко имущи, Тебе кланяющихся ущедри и спаси, яко Человеколюбец.

Запев. Иже источник и кореню Отче, сыи виновен, еси Сыну и Святому Духу, соестественаго Божества, трисолнечныи сердцу моему просвети свет, и причастием осияй, богодейственым сиянием.

Слава. Трисиянная Единице богоначальная, весь разори грехов моих и страстей мрак, светлыми зарями Твоими и сладкими причащении, и сотвори мя Твоея неприкосновенныя славы, церковь и сень одушевленую.

И ныне, Богородичен. Ток древнии естества нашего, пострадавшии неподобно и к тли поползшиися Пречистая, воплощься из утробы Твоея Бог Слово, человеколюбезно осия, и богоначалию трисветлому нас тайно научи.

Песнь 3.

Ирмос. На камени мя веры утверди, разшири уста моя на враги моя, возвеселибося дух мой воспевати: несть свята якоже Бог наш и несть праведна паче Тебе Господи.

Запев. Равенством естества богоначалия, единочестно славлю Тя лицы, живот бо от живота Ты произшед без тли, сыи Един Бог наш, и несть Свята паче Тебе, Господи.

Запев. Ты чины невещественыя небесныя составил еси, яко зерцала Твоея доброты Троице, нераздельное Единоначалие, пети непрестанно Тебе. Но и ныне нашу от бренных уст приими хвалу.

Слава. Утверди на камени веры, и разшири любве Твоея пучиною, сердце и мысль Твоих раб, Единице трисолнечная. Ты бо еси Бог наш, и на Тя уповающе не посрамимся.

И ныне, Богородичен. Иже всяк прежде состав осуществовавыи твари, во утробе Ти осуществовася неизчетною благостию Богородице, и Свет трисолнечныи всем восия, единого Божества и Господьства.

Господи помилуй (трижды).

Седален. Глас 2-й.

Подобен: Вышних ищя:

Святая Троице помилуй, их же созда и избави огня и всякого осуждения, яко вся можеши яко щедр Бог, и многомилостив. Тем же припадаем Ти зовуще, согрешихом прости Человеколюбие.

Слава, и ныне, Богородичен.

Исполньшеся многих язв раби Твои, невидимыми стрелами губителя, и на одре лежаще отчаяния, Владычице зовем: не презри мольбу нашу, иже верою притекающих Ти.

Песнь 4.

Ирмос. Пою Тя, слухом бо Господи услышах и убояхся, до мене бо прииде, мене ища заблуждьшаго. Тем многое Твое сошествие, еже на мя прославляю обновление.

Запев. Разумети Тя не возмогут чинове невеществении ангельстии, Единице Троице безначалная: но убо мы бренным языком Твою существеную благость воспеваем со страхом и славим.

Запев. Сыи Вседержителю, Создатель твари естества человеческаго, все мое видиши ныне неможение, яко Всевидец. Тем же ущедри раба Своего и к жизни лучшей паки возведи.

Слава. Единицы начальныя, несмесна три Лица воспеваем, яко свойствено имуща, и раздельна составы. Но убо совокуплена и нераздельна, во свете и славе Божества.

И ныне, Богородичен. Храм Тя чист и пречист, присно Дево Богородице, Вседетель обрете едину яве от века, в Нем же пожив, вообрази человеческое существо, яко Человеколюбец.

Песнь 5.

Ирмос. Просвещение во тме лежащим, и спасение неначаемым Христе Спасе мой, к Тебе утренюю Царю мирный, просвети мя сиянием си, иного бо разве Тебе Бога не знаем.

Запев. Яко всячески на вся сущия Твоего промышления, миродарныя простирая лучи и спасеныя. Царю смирения, соблюди мя в мире Твоем, Ты бо еси живот и мир всяческому.

Запев. Моисею в купине яко явися в видении огнене, ангел наречеся Отчее Слово, еже к нам Твое проявляя пришествие: им же всем яве возвестил еси державу Богоначалия Единаго Трисоставную.

Слава. Иже естественую соприсносущную славу предложьши, единоначальная Троице Святая, воспевающих Тя православною верою, Твоея славы видети сподоби, безначалную и едину зарю Трисолнечную.

И ныне, Богородичен. Содержителен по существу сыи Бог Слово всем веком, Дево Мати, во чреве Твоем удержася неизреченно, человеки призывая к совокуплению единого Господьства.

Песнь 6.

Ирмос. В бездне греховней одержим, не изследную милосердия Твоего призываю бездну, от тли Боже мя возведи.

Запев. Волителю милости, помилуй иже в Тя верующия, Боже трисолнечне, и прегрешении избави, и от страстей и бед спаси. (Дважды).

Слава. Неизглаголанною пучиною благости, необмыслимую Твоего сияния, и трисияннаго Божества, светодателную светлость даруй ми.

И ныне, Богородичен. Неизглаголанно Дево, Вышний Человек быв из Тебе, в человека всячески оболкся, и светом трисолнечным озари мя.

Господи помилуй (трижды).

Седален. Глас 2-й.

Подобен: Вышних ища:

Христе Боже едине преблагии, Иже кровь Свою нас ради излиявыи, на Кресте повешен, советом Отца Твоего и Духа. Сего ради дерзающе зовем, помилуй стадо Свое Человеколюбче.

Слава, и ныне, Богородичен.

Дево Чистая, помилуй рабы Своя, и избави огня и всякия муки, в нощи и во дни зовущих Твоему Сыну Пречистая: не презри стадо Свое, молитвами Христе, Тебе Рождьшия.

Песнь 7.

Ирмос. О теле злате, на поле деире служимем, трие отроцы нерадиша о безбожном велении, но посреде пламене ввержени прохлаждаеми пояху, благословен Бог Отец наших.

Запев. Уставляеши присно ангельская воинства к непреложению, едине сыи неизменне и трисоставныи Господи. Покажи убо и мое сердце непреложно всегда, во еже славити Тя тепле и воспевати благочестно.

Запев. Лицы умнии невещественых существ, Твоими лучами Боже, единовластне и трисолнечне, озаряеми бывают, положением втории светове. Их же и мене сиянием и причастием покажи свет, яко Светодатель трисиянен.

Слава. Трисветлыми зарями освещаема Троице Пресвятая, во единой державе, храни Своя певцы от противных напастей, да Тя непрестанно славим, Отче, и Сыне, и Пресвятыи Душе, во Едином Божестве.

И ныне, Богородичен. Направляя нас и возвышая к небесем неоскудно, Тебе любящих: иже за не изреченное человеколюбие, быв человек во утробе Девыя и обожив человека, и на Престоле славы со Отцем спосади.

Песнь 8.

Ирмос. В пещь огненую к детем еврейским сошедшаго, и пламень на хлад преложьшаго Бога, пойте вся дела Господа и превозносите Его во веки.

Запев. Неприступная Троице, соприсносущная, собезначалная, богоначалная, неизменная во всех, кроме светоносных свойств, весь лукавыи упраздни сопостатных совет, и смущения бесов, невредна творя мя присно, Господи всяческим.

Запев. Премудро и всемощно, неописанное трисолнечное единоначалие составльшее мiр, и соблюдающее Твоею силою в чину всесовершенном, вселися в мое сердце, пети и славити Тя немолчно с лики ангельскими во вся веки.

Слава. Премудрости Отчая непостижиме, неизреченне Божии Слове, непреложное Твое и Божественое естество не изменив, естество человеческо восприял еси, и единственую Троицу чести всех научил еси, яко господоначальную во вся веки.

И ныне, Богородичен. Правости Мудрость, Яже всех направляющая, возлюби по достоянию Тя, всечистую Деву и светоносную, и несказанно Пречистая, в Тя всельшися. Юже песнословяще, поем зовуще, благословите вся дела Господа, и превозносите Его во веки.

Песнь 9.

Ирмос. Яже прежде солнца светильника Бога восиявша, плотию к нам пришедша из боку Девичу, неизреченно воплотившая, благословеная Чистая: Тя Богородице величаем.

Запев с поклоном. От Света безначальна, собезначален Сын Свет просия, и со естественыи Свет Дух изходит: неизглаголанно, боголепно: нетленну Рожеству уверяеми, вкупе же и неизреченному исхождению.

Запев. Восияй в сердца, трисолнечное Божество, воспевающих Тя трисиянным светом Ти, и даждь разум еже во всех разумети, и зрети Твое хотение, благое и совершеное, и величати и славити Тя.

Слава. Неизочтен естеством сыи, яко Бог, неизочтеную пучину щедрот имея, ущедряя Троице прежде. Тако и ныне ущедри рабы Своя, и от прегрешении избави, и напастей и бед.

И ныне, Богородичен. Спаси мя Боже мой, от всякого искушения и озлобления, Иже в триех лицех воспеваемыи, несказанно единьствене Бог всесильныи. Твое стадо сохрани Богородицы молитвами.


Третьего гласа

Канон Пресвятей и Живоначальней Троице, творение Митрофаново, патриарха Царьграда, емуже краегранесие: Хвалю Тя Троице, едино Богоначалие. Глас третий.

Песнь 1.

Ирмос. Иже воды древле манием божественым, во едино соньмище совокупи, и раздели море израильтеским людем. Се Бог наш препрославен есть, Того Единого воспоем, яко прославися.

Запев: Пресвятая Троице Боже наш, слава Тебе (поклон).

Непостижимая едина, Господоначалная, и едино троическое Богоначалие, трисияннаго света Твоего сподоби мя, яко да воспою Тя певаемую непрестанно трисвятую силу ангельскими усты.

Запев. Священно невеществении вси чинове поют, яко творческую вину единственую трисветлую, начальнейшии Тя свет. Юже согласно поем, и человеческая множества и верно славим бренными усты.

Слава. Ум и Слово, и Дух, богословцы присно образно Тебе наричут, Безстрастно Рожество, от нерождена Отца Сыну знаменующу, Боже единоначальне всем вкупе, и Божественаго Духа исхождение.

И ныне, Богородичен. Яко Человеколюбец естеством, человеческое существо прием Божии Слове, троичныи восиял еси единоначалнейшии свет единаго Божества, препрославлену всем показа рождьшую Тя Деву Пречистую.

Песнь 3.

Ирмос. Иже от несущих вся приведыи, словом созидаемая, совершаема же Духом, Вседержителю Вышнии, в любви Своей утверди мене.

Запев. Утроити воду древле повелев Илия на поленах, образно прояви троичныя составы единьственаго Божия Господоначалия.

Запев. Тленное естество, поет Тя земнородных, единого и трисветлаго Создателя неизменнаго, и вопию Ти Владыко всякаго мя напрасньства избави и спаси мя.

Слава. Равно вещающе словесем пророческим, премудрых апостол же и проповедник веры, равнодетельную Троицу Тя славословим вернии, Боже всех.

И ныне, Богородичен. От Престола высокаго сниде Слово, человека возвышая, яко Человеколюбец, Тобою Пречистая, и трисолнечныи Свет всем восия.

Господи помилуй (трижды).

Седален, глас 3.

Подобен: Красоте девства:

Троице нераздельная и неразлучная, нас помилуй, поклоняющихся Ти (поклон), и воспевающих благочестно, и зовущих непрестанно Тебе: спаси их же собрала еси милосердия ради милости, в церкви святей Твоей, еже славити державу Твою. Ибо яко Милостив, веси сердца нашего немощь.

Слава, и ныне, Богородичен.

Весь изменихся невоздержанием, и безстрашием моим несмысленыи, нечувьствуя окаянныи, не трепещу дне, его же трепещут вся видимая и невидимая. Владычице помози ми, и сердечное разори недоумение. Сама бо еси упование, и предстательница рабом Твоим.

Песнь 4.

Ирмос. Положи к нам твердую любовь си Господи, Единочадаго бо Ти Сына нас ради на смерть вдал еси. Тем же Ти вопием, восхваляюще: слава силе Твоей.

Запев. Отрасле сугубе от Отца, яко от корене прозябоста, Сын и Дух Правыи, соестествена прозябения и богосажденна, и цвети собезначальнии. Яко трием быти светилом Божества. (Дважды).

Слава. Собори умных существ, непрестанно поют Тя недоведомаго Бога. С ними же и мы славим, глаголюще: Троице пресущная, Своя рабы сохрани, яко Милосерд.

И ныне, Богородичен. Распалил еси нас в любовь Твою, Многомилостиве Слове Божии, Иже нас ради воплощься непреложно, и трисветлое едино Божество тайно сказав. Тем же Тя славим.

Песнь 5.

Ирмос. Яко виде Исаия образно на Престоле превысоце Бога, от ангел славы дароносима, О! окаянныи вопияше аз, провидех бо воплощаема Бога, Света невечерня, и мiром обладающа.

Запев. Единаго Господоначальника, образно яко виде Исаия Бога, в триех Лицех славословима пречистыми гласы, серафим послан бысть проповедати абие трисветлое Существо, и Единицу трисолнечную.

(Дважды).

Слава. Иже не видимых и видимых естество, от несущих прежде составльшая Единице трисолнечная, иже единого Тя Бога верно воспевающих, от всяких искушении избавльши, Твоей славе сподоби.

И ныне, Богородичен. Невестник светоносен и чист, бывшая Дево Богу, воспеваем Тя любовию и блажим. Из Тебе бо родися Христос, в существех и хотениих сугубых, Иже единыи от Троицы, славе сыи Господь.

Песнь 6.

Ирмос. Бездна последняя грехов обыде мя, и исчезает дух мой. Но простер Владыко высокую Свою мышцу, яко Петра мя Управителю спаси.

Запев. Преселник сыи Авраам, сподобися образно восприяти, во образе убо Господа, в триех составех пресуществена, мужескими зраки.

(Дважды).

Слава. Направи сердца Своих раб, к свету неприступному, о трисолнечне Господи. И Твоея славы сияние подаждь душам нашим, еже облистатися Твоею добротою неизреченною.

И ныне, Богородичен. Отверзи мне двери Света, рождьшагося от утробы Твоея Пречистая, да зрю трисветлую лучу Божества, и славлю Тя всесветлую Владычицу.

Господи помилуй (трижды).

Седален, глас 3.

Подобен: Девая днесь:

Егда приидеши Владыко на землю судити всем, их же от земли создал еси по Своему образу, ущедри яко Милостив, и избави всех Суда Твоего праведнаго, и не посли нас во огнь геенскии, яко един Христе многомилостив.

Слава, и ныне, Богородичен.

Стонание ми даруй Дево, яко же мытареви и блуднице слезы, да Тебе сия приношаю и зову: помилуй мя Всемилостивая, и разреши недоумение мое благодатию Си, умиления тучу ми подавая: к Тебе бо прибегох Пречистая.

Песнь 7.

Ирмос. Якоже древле благочестивыя три отроки оросил еси, в пламени халдейстем, светлым божества огнем, и нас озари, благословен еси зовущих, Боже Отец наших.

Запев. Храм мя покажи Твоего Божества Владыко, трисияннаго, всесветла, греховнаго омрачения лютаго, и страстей вышша, светодательными Твоими сиянии. Боже Отец наших благословен еси.

(Дважды).

Слава. Божества Твоего зрак един возвещаем, в триех составных и нераздельных свойствах, Отца и Сына и Духа. Благословен еси зовуще, Боже Отец наших.

И ныне, Богородичен. Явися на земли, быв Человек Вседетель, боголепно от Девическия и пречистыя Ти утробы и нас обожи, благословен еси зовущих Боже Отец наших.

Песнь 8.

Ирмос. Непостоянным огнем совокупльшеся, иже благочестием предстояще юноши, пламенем же неврежени, божественую песнь пояху: благословите вся дела Господня Господа, пойте и превозносите Его во веки.

Запев. Безначальна Отца яко от корене, Слово и Дух собезначальна по естеству суща, яко отрасли пресущественаго Богоначалия, показаша Троицы славу едину и силу, Юже песнословим во вся веки. (Дважды).

Слава. Управляеши Твоими светлостьми чины небесныя, воспевати немолчно трисвятыми песньми божественными, Отче и Слове сообразне и Душе, трисветлую державу и равномощную. С ними же Тя поем во вся веки.

И ныне, Богородичен. Проречения пророческая, Твое Рожество Богородице, издалеча видевше восхваляху, яко без семене и паче естества Рождьшагося, Владычице, и согласно Сего поем яко Господа, и Тебе рождьшую чтем Дево во вся веки.

Песнь 9.

Ирмос. Новое чудо и боголепно, Девическую убо дверь затворену яви прошедыи Господь, наг во входе, и плотоносец явися во исходе Бог, и пребывает дверь затворена. Сию непрестанно, яко Матерь Богу величаем.

Запев с поклоном. Видети славу трисиянную, боговиднии безплотных чинове яве, невеществеными крилы восходити желают горе, но говеют зело неприступному Свету, и пение непрестанно вопиют. С ними же согласно, единьственая Троице, Тя славим. (Дважды).

Слава. Несытною любовью иже на земли, умную душу от Тебе приемше и словесную, Тебе поем, Владыко Боже Вседержителю, единьственое естество воистину и троичное лицы, от всего сердца. Тем же Всещедре, яко Всесилен соблюди нас.

И ныне, Богородичен. Храм мя покажи, единоначальнаго и трисветлаго Твоего Богоначалия световиден. Чисто служити Тебе Зиждителю всех, и неизреченную Ти славу умно зрети. Молитвами единыя Богородицы, Юже достойно яко Преславную величаем.


Четвертаго гласа

Канон Святей и Живоначальней Троице, емуже краегранесие: Четвертое пение Богу. Творение Митрофаново, патриарха Царьграда. Глас 4.

Песнь 1.

Ирмос. Моря чермнаго пучину, немокрыми стопами, древле шествовав Израиль, крестообразно Моисеовыма рукама, амаликову силу в пустыни победил есть.

Запев: Пресвятая Троице Боже наш, слава Тебе (поклон).

Троицу богоначалную да прославим составы, единьственую, естеством триех, соприсносущную, сопрестольную, Юже моляще глаголем: спаси иже верою Тебе славящих.

Запев. Помазан от Отца Духом радости, богоделным елеом, яко Сын и Человек бысть, и единого Божества трисоставное научил есть.

Слава. Доброту неприступныя славы Твоея, Единице трисолнечная, Серафими не терпяще зрети, спокрываются крилы, и трисвятыми песньми непрестанно Тебе славят.

И ныне, Богородичен. Неизреченно Творца всех родила еси Пречистая, избавляющаго древния клятвы человеки, и смертныя тли. И Тебе ради познахом, единаго Бога трисоставнаго.

Песнь 3.

Ирмос. Не мудростию, ни силою, ни богатьством хвалимся, но Твоею Отчею составною мудростию Божиею, яко несть свята паче Тебе Человеколюбче.

Запев. Силу свыше святым Твоим прежде апостолом, яко послал еси Христе, от Отца Утешителя, едино явил еси естество трисолнечное.

Запев. Патриарху Аврааму, егда явися во образе мужесте, троичная Единице, непременное показала еси Твоея благости господьство.

Слава. Иже в Лицех триех, един Бог веруемыи, неописанныи яве и недомыслимыи всеми, избави душа наша от всякия скорби.

И ныне, Богородичен. Наставльшеся Сына Твоего яве наученьми, единственое и трисветлое Богоначалие славим, и Тебе блажим присно Девую.

Господи помилуй (трижды).

Седален. Глас 4-й.

Иже единым мановением, и пречистым советом Отца Твоего и Духа, создал еси всяческая, Христе Многомилостиве, распятие прият за род человеческии. Тем же благодаряще воспеваем вопиюще, помилуй стадо Свое, едине Человеколюбче.

Слава, и ныне, Богородичен.

Поем Тя Богоневесто Мати Христа Бога, славяще Рожество Твое непостижимое, им же избавихомся прелести диявольския, и всех напастей, Владычице Богородице. Тем же верою вопием Ти, помилуй стадо Свое, едина Всепетая.

Песнь 4.

Ирмос. Седяи во славе, на престоле Божественем, на облаце легце, прииде Исус Пребожественыи, от Пречистыя Девы, и спасе вопиющая, слава Христе силе Твоей.

Запев. Пресущная Троице, во единице Божества и Господоначалия, с Серафимы Тебе славим, яко нераздельно естество, яко неслитно, яко равномощно славою, Боже непостижиме.

Запев. Разделенную неизреченно Лицы Божества, и соединяему державою единаго Господьства, безпредельну, едину неописанну, воспеваем Тя, Творца всея твари.

Слава. Ум безначальныи, Слово неизглаголанно роди, и Божественныи Дух равномощныи, от Него же изыде. И сих ради Троицу единосущную воспеваем Тя, Бога Творца всея твари.

И ныне, Богородичен. Зряся древними образно предвозвестити, еже от Тебе Дево, воплощение Слова: но послежде явлься человеком, поистине трисоставное Единоначалие явив.

Песнь 5.

Ирмос. Удивишася всяческая о божественей славе Твоей. Ты бо браку неискусимая Девице, прият во утробе надо всеми сущаго Бога, и родила еси безлетнаго Сына, всем воспевающим Тя мир подавающа.

Запев. Разумевше от веры вседетельнаго Божества, едино убо неприступно Существо, три же составы живоначалны сраслены поем, Отца и Сына, и Духа Святаго, соприсносущное бытие.

Запев. Свете трисолнечне, существенаго света Твоего восияй ми, единьственое Божество, несозданное Естество, Светодателю и Источниче всякия светодательныя зари, да созерцаю Твою доброту неизреченную.

Слава. Яко единому сущу Содетелю всяческих, и Содержителю, и кормчии всепремудру воистину, и жизни Подателю, припадаем Ти вернии: Владыко трисолнечне, поющих Тя соблюди.

И ныне, Богородичен. Обожити хотя древле истлевшаго человека, его же за благость создав, Сын Твой Дево, и показав образ божественаго зрака, Человек бысть из Тебе, и едино трисолнечно богоначалие проповеда.

Песнь 6.

Ирмос. Возопил прообразуя погребение тридневное, пророк Иона в ките моляся, из тли спаси мя, Исусе Царю сыи силам.

Запев. Яви Отец изглаголя сыновьство, и Дух, Христу крестившуся, видим быв. Сего ради едино Троичное Богоначалие славим.

Запев. Яко видев Тя трисвятыми гласы воспеваема Исаия, на высоце престоле седяща, Троичныя позна единаго Богоначалия составы.

Слава. Возвышено сердце покажи и нас раб Твоих, высокии Царю трисоставне, да Твоея славы зрим ясно светлость.

И ныне, Богородичен. Согреших, но Тебе не отступих окаянныи, ущедри мя трисоставне, едино Божество честное, и лютаго мя избави осуждения, мольбами Богоотроковицы.

Господи помилуй (трижды).

Седален. Глас 4-й.

Непостижимыи Боже и неприступныи, Иже един естеством Благ же и Милосерд, Отче и Сыне и Душе Всесвятыи, соблюди и освяти, иже верою вопиющих в церкви святей Твоей, в нощи и во дни, и не предаждь нас Владыко врагом, ищущим нашу погибель.

Слава, и ныне, Богородичен.

Не премолчим присно Дево, благодарно воспевати от сердца раби Твои, Твоя милости Владычице, зовуще и глаголюще: Пресвятая Дево предвари и избави от враг невидимых и бед, и всякого прещения, Ты бо еси наше заступление.

Песнь 7.

Ирмос. В пещи авраамския дети персидстей, любовию благоверия паче, нежели пламенем опаляеми, взываху: благословен еси в церкви славы Твоея Господи.

Запев. Учиненая небесная естества и умныя чиновы, православно вси земнороднии подражающе славим: едино Божество в триех равнодетельных составех.

Запев. Речи святых пророк Тя древле образно Единаго веком всем творительна проявиша, неизреченнаго Бога и Господа, богоначальными треми составы.

Слава. Славою и честию поклоняемся (поклон) Троице пресовершеней, во единой воли в триех Лицех, ими же состоится тварь вся блюдома, востанием Христа благословенаго Бога.

И ныне, Богородичен. Иже по существу невидимое Слово, и вседетельное явился еси человеком, от чистыя Боюматере Человек, человека призывая к Причастию Христе Твоего Божества.

Песнь 8.

Ирмос. Руце распростер Даниил, львова зияния в рове затче, огненую же силу угасиша добродетелию поясавшеся, иже благочестия любители отроцы взывающе: благословите вся дела Господня Господа.

Запев. Свете единственыи и трисиянныи, Существо безначальное, доброто недоведомая, в сердце моем вселися, и храм Твоего Божества световиден и чист покажи мя, зовуща: благословите вся дела Господня Господа.

Запев. От различных мя страстей, Троице неразделная, Единице неслитная, омрачения прегрешении избави, и озари лучами Твоими богодетельными, да зрю Твою славу, и воспеваю Тя славы Господа.

Слава. Кто изрещи может, или разумети Бога когда в существе Божии? Его же ни ангели вси, ни архангели могут исповедати достойно. Той бо изшед от существа Отча, разори врага востанием Своим.

И ныне, Богородичен. Ум убо не рожденный Отец, и Слово сообразно, и Дух сопрестолен: существо, сила, бытие. Пресущная неизреченная, великодейственая Троице Единице, соблюдай стадо Свое, молитвами Богородицы яко един Человеколюбец.

Песнь 9.

Ирмос. Всяк земнородныи да взыграется Духом просвещаемь, да ликоствует же безплотных умов естество, почитающее святое торжество Божия Матере, и да поет: радуися Преблаженая Богородице чистая присно Дево.

Запев с поклоном. Все к Тебе ныне движу сердце мое и мысль: и любы же от всея души и тела, Создателю и Избавителю моему, единовластне трисветле, и вопию Ти: спаси мя раба Твоего, от напастей всяких и скорбей.

Запев. Возвыси наш ум и мысль к Тебе Вышнему, Отче, и Слове, и Утешителю, во свете живыи неприступнем, славы солнце Светодержьче, просвети Твоими сияньми пречистыми, всегда славити Тя единоначальнаго Бога трисоставнаго.

Слава. Един Свет в трех собьствех, Лицы разделяемыи, Отец и Сын и Дух Святыи, Ими же вся тварь состоится. Юже обновляя Сын, сниде и пострадав, воскресе тридневно.

И ныне, Богородичен. Спаси иже в Тя верующыя Господи, и проповедающих Безначальное, Присносущее Существо едино, три же Лица богоначальна и сообразна Твоего господьствия, и божественей славе сподоби, мольбами чистыя Богоматере.


Таже, припевы Григория Синаита по троичном каноне, по вся воскресения.

Достойно есть боголепно, еже славити Тя, Троице Святая, необыменнаго и пресущнаго, и всеблагаго Бога нашего, юже поют вси земнороднии, и славословят силы небесныя, еже от всех верно поклоняемую, единицу по существу триипостасную.

Господоначальную херувим и богоначальную без разсуждения серафим, юже нераздельну Троицу во единице, сущее богоначалие, Тя величаем.

Отцу безначальну и Богу собезначальну, Слову со Духом поклоняюся (поклон): неразлучну, едину, соединяему по существу, тричисленую Единицу, верою славим.

Воспоем вси боголепно, песньми божествеными, Отца же и Сына, и Духа божественаго, трисоставное естество, едино царство же и господьство.

Лучезарныя Твоя молнии восияй ми, Боже мой, трисоставне Вседержителю, и дом мя покажи Твоея неприступныя славы, светел и светоносен и неизменен.

Достойно есть яко воистину славити Тя Бога Слова, Его же трепещут и ужасаются херувими, и славословят силы небесныя, Иже от Девы неизреченно воплощьшагося Христа Жизнодавца, со страхом прославим.

Слава. Отче Вседержителю, Слове Божии, Всесвятыи Душе, едина сила и образ, едино царство и божество и власть, помилуй и спаси поклоняющихся Ти (земной поклон).

И ныне. Из мертвых видевши Твоего Сына, Пречистая Дево, воскресша боголепно, радости неизреченныя тварь исполняшеся, Того славяще, Тебе величаем.

Посем Трисвятое. И по Отче наш. Кондак настоящаго гласа.

Глас 1.

Воскресл еси яко Бог из гроба в славе, и мiра совоскресил еси, и естество человеческое яко Бога воспевает Тя, и смерть исчезе, Адам же ликует Владыко, Евва ныне от уз свобождаема радуется зовущи: Ты еси, Иже всем подая, Христе воскресение.

Глас 2.

Воскресл еси от гроба, Спасе Всесильне, и ад виде чудо сие ужасеся, и мертвии восташа: тварь же видящи, радуется с Тобою, и Адам вкупе веселится, и мiр, Спасе мой, воспевает Тя присно.

Глас 3.

Воскресл еси днесь из гроба Щедре, и нас возведе от врат смертных, днесь Адам ликует, и радуется Евва: вкупе же пророцы с патриархи воспевают непрестанно Божественную державу власти Твоея.

Глас 4.

Спас и Избавитель мой, из гроба яко Бог, воскресив от уз земнородныя, и врата адова сокрушив, и яко Владыка воскресе тридневен.

Таже, Господи помилуй (40).

Слава, и ныне.

Честнейшую херувим.

Именем Господним благослови, отче.

За молитв святых отец наших, Господи Исусе Христе, Сыне Божии, помилуй нас. Аминь.

И глаголем молитву сию, Пресвятей Троице, творение Марка инока:

Всемогущая и Животворящая Святая Троице, и светоначальная, яже мiрную всякую и премiрную тварь, за едину благость от несущих приведыи, и промышляя и содержащи, иже по прочих Твоих неизреченных о земном роде благодеяниих, и покаяние нам ради плотьскаго неможения до смерти даровавыи, не остави нас окаянных в лукавых наших деяниих умрети, ниже злоначальнику и завистьцу, и губителю посмешьство быти. Зриши бо Благосерде, елик убо оного на нас навет и вражда, елико же и наше страстование и слабость и небрежение, но неоскудныя Ти благости соделай на нас, молим на всякии день и час прогневающии Тя, честных и животворных заповедей преступлением. И вся убо всего прешедшаго живота нашего, и до нынешняго часа согрешенная нами, в деяниих, или глаголаниих, или в помышлениих, остави и прости. Сподоби же нас, прочее скончати житие в покаянии, и умилении, и соблюдении святых Твоих повелении.

Аще убо сладостию прельстившеся, многообразне согрешихом, или мiрскими похотьми неполезными и вредными обольстившеся препроводихом, аще гневом и яростию подвигшеся безсловесною, кого брата нашего оскорбихом, аще языком неизбежных и стропотных и крепких сетей объяхомся, аще коим чувст наших, или всеми волею или неволею, ведуще или неведуще от восхищения или поучения безумно поползохомся, аще же лукавыми помыслы и суетными совесть осквернихом, аще ли коим другим образом прегрешихом, от предприятия и обычая томими злаго, прости нам, и остави вся Всещедре, Преблаже и Многомилостиве, и даруй нам прочее бодрость и силу, во еже творити волю Твою благу, и благоугодну и совершену, да нощнаго и мрачнаго зла, световидным покаянием пременьшеся, и яко во дне благообразно ходяще, и очищени объявимся человеколюбию Твоему недостойнии, воспевающе Тя и величающе во веки, аминь.

Слава, и ныне. Господи помилуй (Дважды), Господи благослови.

Отпуст. Воскресыи из мертвых, Господи Исусе Христе, Сыне Божии, молитв ради Пречистыя Ти Матере, и преподобных и богоносных отец наших, и всех ради святых, помилуй и спаси нас, яко Благ и Человеколюбец.

Аминь. И прочее все, якоже в повседневней написася полунощнице.