Тропари и богородичны и кондаки дневныя

ТРОПАРИ И БОГОРОДИЧНЫ И КОНДАКИ ДНЕВНЫЯ

В понедельник, тропарь безплотным, глас 4. Небе́сных во́иньств архистрати́зи, мо́лим вас ны́не мы недосто́йнии, я́ко да ва́шими моли́твами, покры́ете нас кро́вом крилу́, невеще́ственыя ва́шея сла́вы, сохраня́ю­ще нас моля́щихся приле́жно и вопию́щих: от бед изба́вите нас, я́ко чинонача́льницы вы́шним си́лам.
Богородичен. Я́ко всех тва́рей лу́чьши еси́ Богоро́дице, пе́ти Тя Де́во, досто́йно недоуме́юще. Ту́не, мо́лим Тя, поми́луй нас.
Кондак, глас 2. Архистрати́зи Бо́жии и слуги́ боже́ственыя сла́вы, а́нгелом нача́льницы, и наста́вницы челове́ком, е́же есть на по́льзу проси́те нам и ве́лия ми́лости, я́ко безпло́тным архистрати́зи.
Во вторник тропарь Иоанну Предотечи, глас 2. Па́мять пра́веднаго с похвала́ми, тебе́ же довле́ет свиде́тельство Госпо́дне, Предоте́че: яви́лбося еси́ вои́стину проро́к честне́йши, я́ко и в бы́стринах крести́ти сподо́бился еси́ Пропове́даннаго. Тем же и за и́стину пострада́в ра́дуяся; благовести́л еси́ и во а́де су́щим, Бо́га я́вльщагося пло́тию, взе́млющаго грехи́ мира, и подаю́щаго нам ве́лию ми́лость.
Богородичен. Бо́жию бы́хом естеству́ о́бщницы Тобою́, Богоро́дице при́сно Де́во, Бо́га бо нам воплоще́нна родила́ еси́. Тем же по́долгу Тя, вси благоче́стно велича́ем.
Кондак, глас 3. Непло́ды днесь Христо́ва Предоте́чу ражда́ет, и той есть соверше́ние вся́каго проро́чества. Его́ же бо проро́цы пропове́даша, на Том во Иорда́не ру́ку положи́, и показа́ся Бо́жию Сло́ву, проро́к и про­пове́дник, вку́пе и Предоте́ча.
В среду и в пяток тропарь Честному Кресту, глас 1. Спаси́ Го́споди, лю́ди Своя́ и благослови́ достоя́ние Твое, побе́ды держа́ве Росси́йстей на сопроти́вныя да́руй и Своя́ сохраня́я Кресто́м лю́ди.
Крестобогородичен. И́же Твое́ заступле́ние стяжа́вше Пречи́стая, и Твои́ми моли́твами от бед избавля́емся. Кресто́м бо Сы́на Твоего́ всегда́ храни́ми везде́, по́долгу Тя вси благоче́стно велича́ем.
Кондак, глас 4. Вознесы́ися на́ Крест во́лею, те­зой мени́тому ны́не гра́ду Твоему́, щедро́ты Твоя́ да́руй, Христе́ Бо́же. Возвесели́ си́лою Свое́ю держа­ву Российскую, побе́ды дая́ ей на супоста́ты. Посо́­бие иму́щу Твое́ ору́жие, ми́ру непобеди́мую побе́ду.
В четверток тропарь апостолом, глас 3. Апо́столи святи́и, моли́те ми́лостиваго Бо́га, да грехо́в оставле́ние пода́ст душа́м на́шим.
Тропарь святителю Николе, глас 4. Пра́вило ве́ре и о́браз кро́тости, воздержа́нию учи́теля яви́ тя Госпо́дь ста́ду Своему́, я́же веще́м и́стина. Сего́ ра́ди стяжа́в смире́нием высо́кая, нището́ю бога́тая, о́тче наш святи­телю Нико́лае. Моли́ Христа́ Бо́га, спасти́ся душа́м на́шим.
Богородичен. Сло́во О́тчее, Христа́ Бо́га на́шего, из Тебе́ вопло́щьшееся разуме́хом, Богоро́дице Де́во. Того́ моли́ спасти́ душа́ на́ша.
Кондак апостолом, глас 2. Тве́рдыя и боговеща́нныя пропове́датели, верх учени́к Твои́х Го́споди, прия́т в наслажде́ние, благи́х Твои́х поко́я. Труды́ бо их и смерть прия́т па́че вся́каго приноше́ния, Еди́не све́дыи серде́чная.
Кондак святителю Николе, глас 3. В Ми́рех свя́те Нико́лае, святи́тель яви́ся. Христо́во бо днесь, преподо́бне ева́нгелие испо́лнив, положи́л еси́ ду́шу свою́ за́ люди своя́, и спасл еси́ непови́нныя от сме́рти. Сего́ ра́ди освяти́ся, и яви́ся ве́лии таи́нник Бо́жия благода́ти.
В субботу тропарь всем святым, глас 2. Апо́столи, проро́цы и му́ченицы, святи́телие, преподо́бнии и пра́веднии, и́же до́бре по́двиг сконча́вше, и ве́ру соблю́дше, дерзнове́ние иму́ще ко Спа́су, мо́лим вы: о нас Того́ моли́те, я́ко Бла́га, спасти́ душа́ на́ша.
Богородичен. Ма́ти свята́я пречи́стаго Све́та, а́н­гельскими пе́сньми чту́ще Тя, пое́м и велича́ем.
Кондак, глас 8. Я́ко нача́тки естества́, Соде́телю тва́ри, вселе́нная прино́сит Ти Го́споди, богоно́сныя му́ченики. Тех моли́твами во смире́нии глубо́це, це́рковь Свою́ и град Свой, Богоро́дицы ра́ди соблюди́, еди́не Многоми́лостиве.
Тропарь за упокой, глас 2. Помяни́ Го́споди, я́ко Благ, рабы́ Своя́, и ели́ка в житии́ сем согреши́ша, прости́. Никто́ же бо без греха́, то́кмо Ты моги́и преста́вленым да́ти поко́й.
Ин тропарь, за упокой же, глас 8. И́же глубина́ми му́дрости, человеколю́бне вся строя́: и е́же на по́льзу всем подава́я, еди́не Соде́телю, поко́й Го́с­поди, душа́ усо́пших раб Свои́х. На Тя бо упова́ние возложи́ша, Творца́ и Зижди́теля и Бо́га на́шего.
Богородичен. Тебе́ град и приста́нище и́мамы, и Моли́твеницу благоприя́тну, к ро́ждьшемуся из Тебе́ Бо́гу. Богоро́дице безневе́стная, ве́рным спасе́ние.
Кондак за упокой, глас 8. Со святы́ми поко́й, Христе́, душа́ раб Свои́х, иде́же несть боле́зни, ни печа́ли, ни воздыха́ния, но жизнь ве́чная.