Кондаки и икосы воскресны, на осмь гласов

КОНДАКИ И ИКОСЫ ВОСКРЕСНЫ, НА ОСМЬ ГЛАСОВ

Кондак, глас 1, подобен: егда приидеши во славе.Воскре́сл еси́, я́ко Бог, и́з гроба в сла́ве, и мир совоскреси́л еси́. И естество́ челове́ческое, я́к Бо́га, воспева́ет Тя, и смерть исчезе́, Ада́м же лику́ет, Влады́ко. Е́вва ны́не от уз свобожда́ема, ра́дуется зовущи: Ты еси́, И́же всем подая Христе́, воскресе́ние.
Икос. Воскре́сшаго тридне́вно воспое́м, я́ко Бо́га всесильна, и врата́ а́дова сокруши́вшаго, и И́же о́т века и́з гроба воздви́гшаго, мироно́сицам я́вльшагося, я́коже благоизво́лил есть, пре́жде сим, е́же ра́дуйтеся реки́и. И апо́столом ра́дость возвеща́ет, я́ко еди́н то́кмо Жизнода́вец сы́и. Тем же ве́рою жены́ ученико́м зна́мения побе́ды благовеству́ют. И ад сто́нет, и смерть рыда́ет. Мир же весели́тся, и вси с ним ра́дуются о Христо́ве воскресе́нии. Ты бо подае́ши Христе́, всем воскресе́ние.
Кондак, глас 2, подобен: вы́шних ища. Воскре́сл еси́ о́т гроба, Спа́се всеси́льне, и ад ви́де чу́до сие́ ужасе́ся, и ме́ртвии воста́ша. Тварь же ви́дящи, ра́дуется с Тобо́ю, и Ада́м вку́пе весели́тся. И мир, Спа́се мой, воспева́ет Тя при́сно.
Икос. Ты еси́ свет омраче́нным, Ты еси́ воскресе́ние всех, и живо́т челове́ком. И всех с Собо́ю воскреси́л еси́, сме́ртную держа́ву Спа́се разо́рь, и а́дова врата́ сокру­ши́л еси́, Сло́ве. И ме́ртвии узре́вше чу́до сие́, удиви́шася. И вся тварь ку́пно ра́дуется о воскресе́нии Твое́м, Человеколю́бче. Тем же и вси сла́вим и воспева́ем Твое́ снисхожде́ние, и мир, Спа́се мой, воспева́ет Тя при́сно.
Кондак, глас 3, подобен: Девая днесь. Воскре́сл еси́ днесь и́з гроба, Ще́дре, и нас возведе́ от врат сме́ртных. Днесь Ада́м лику́ет и ра́дуется Е́вва. Вку́пе же проро́цы с патриа́рхи воспева́ют непреста́нно Боже́ственную держа́ву вла́сти Твоея́.
Икос. Не́бо и земля́ днесь да ликовству́ют, и Христа́ Бо́га единому́дрено да воспева́ют, я́ко у́зники от гроб воскреси́в. Вку́пе ра́дуется вся тварь, принося́щи досто́йныя пе́сни, Созда́телю всех и Изба́вителю на́шему, я́ко челове́ки из а́да днесь я́ко Жизнода́тель совозве́д, и на небеса́ с Собо́ю возне́с, и низло́жь вра́жия возноше́ния, и врата́ а́дова сокруши́в, боже́ственою держа́вою вла́сти Своея́.
Кондак, глас 4, подобен: явися днесь.Спас и Изба́­витель мой, и́з гроба я́ко Бог, воскреси́в от уз земноро́дныя, и врата́ а́дова сокруши́в и я́ко Влады́ка воскре́се тридне́вен.
Икос. Воскре́сшаго из ме́ртвых Христа́ Жизнода́вца тридне́вно и́з гроба, и врата́ сме́ртная днесь сокру́шьшаго си́лою Свое́ю, и а́да умертви́вшаго, и жа́ло сме́ртное сте́ршаго, и Ада́ма с Е́ввою свободи́вшаго, воспое́м вси земноро́днии благода́рствено, вопию́ще хвалу́ приле́жно. Той бо, я́ко еди́н кре́пкии Бог и Влады́ка, воскре́се тридне́вен.
Кондак, глас 5, подобен: подобник сыи. Ко а́ду, Спа́се мой, соше́л еси́, и врата́ сокруши́в, я́ко всеси́лен. Уме́рших, я́ко Созда́тель, совоскреси́л еси́, и сме́рти жа́ло сокруши́в, и Ада́м от кля́твы изба́влен бысть, Человеколю́бче. Тем же еси зове́м: спаси́ нас, Го́споди.
Икос. Услы́шавше жены́ а́нгеловы глаго́лы, отложи́ша рыда́ние, ра́достни бы́ша и тре́петни, у́жас бо ви́деша. И се Христо́с прибли́жися к ним глаго́ля, еже ра́дуйтеся, дерза́йте, Аз ми́ра победи́х, и у́зники свободи́х. Потщи́теся у́бо ко ученико́м возвеща́юще им, я́ко варя́ю вы во́ граде галиле́йстем, е́же пропове́дати Мя. Тем же вси Тебе́ вопие́м: спаси́ нас, Го́споди.
Кондак, глас 6, подобен: еже о нас соверши́в. Живонача́льною дла́нию, уме́рших от мра́чных удо́лий, Жизнода́вец воскреси́в всех Христо́с Бог, воскресе́ние дарова́в челове́ческому ро́ду. Есть бо всех Спаси́тель и воскресе́ние и живо́т, и Бог вся́ческим.
Икос. Кре́ст и погребе́ние Твое́, Жизнода́вче, вос­пева́ем ве́рнии и покланя́емся (поклон), я́ко ада связа́л еси́ Безсме́ртне, я́ко Бог всеси́льныи, и ме́ртвых совоскреси́л еси́, и врата́ сме́ртныя сокруши́л еси́, и держа́ву а́дову низложи́в, я́ко Бог. Тем же земноро́днии славосло́вим Тя любо́вию, воскре́сшаго и низложи́вша вра́жию держа́ву всепа́губную, и всех воскреси́вшаго, и́же в Тя ве́ровавших, и мир изба́вльшаго от стрел зми́евых, и от пре́лести вра́жия, я́ко Бог вся́ческих.
Кондак, глас 7, подобен: не к тому́ пла́менное. Не к тому́ держа́ва сме́ртная возмо́жет держа́ти челове́ки, Христо́с бо сни́де сокруша́я и разоря́я си́лы ея́, связу́емь бывает ад. Проро́цы согла́сно ра́дуются, предста́ глаго́люще Спас су́щим в ве́ре: изы́дите ве́рнии в воск­ресе́ние.
Икос. Вострепета́ша до́ле преиспо́дняя днесь, ад и смерть еди́наго от Тро́ицы убоя́шася. Земля́ поколеба́ся, вра́тницы же а́дови ви́девше Тя, ужасо́шася, и вся тварь с проро́ки ра́дующися пое́т Ти побе́дную песнь, Изба́вителеви Бо́гу на́шему, разруши́вшему ны́не сме́ртную си́лу. Да воскли́кнем и возопие́м ко Ада́му и к су́щим из Ада́ма, дре́вом сего́ па́ки введе́: изы́дите ве́рнии в воскресе́ние.
Кондак, глас 8, подобен: яко нача́тки естества́. Воскре́с и́з гроба, уме́рших воздви́гл еси́, и Ада́ма воскреси́л еси́. И Е́вва лику́ет в Твое́м воскресе́нии. Мирсти́и концы́ торжеству́ют в воста́нии Твое́м из ме́ртвых, Многоми́лостиве.
Икос. А́дова ца́рьствия плени́в, и ме́ртвых воскре­си́в Долготерпели́ве, жены́ мироно́сицы усре́т. В ме́сто печа́ли, ра́дость прине́с. И апо́столом Твои́м возвести́л еси́ зна́мения побе́ды, Спа́се мой Живода́телю, и тварь просвеща́еши, Человеколю́бче. Сего́ ра́ди и мир ку́пно ра́дуется в воста́нии Твое́м из ме́ртвых, Много­ми́лостиве.